လုပ်ငန်းခွင် လေ့လာရေး(၂)

ဒီ

နေ့ ဇူလိုင်လ ၅ ရက်နေ့မှာ ကျွန်တော်တို့ သွားခဲ့ရတဲ့ လုပ်ငန်းခွင်ကတော့ မော်စကိုမြို့ အနောက်မြောက် ဘက်ပိုင်းမှာ တည်ရှိတဲ့ မြေအောက်ရထားလမ်း ဥမင်တည်ဆောက်ရေး လုပ်ငန်းခွင်ပဲ ဖြစ်ပါတယ်။ မနက် ၉ နာရီမှာ ကျောင်းရှေ့ကနေ ဌာနက စီစဉ်ပေးတဲ့ မီနီဘတ်စ်ကားလေးနဲ့ စတင်ထွက်ခွာခဲ့ပါတယ်။ မိနစ် ၄၀ လောက်ကြာအောင် ကားစီးပြီးတဲ့ နောက်မှာ ကျွန်တော်တို့ လေ့လာမယ့် လုပ်ငန်းခွင် ရှိရာကို ရောက်ရှိခဲ့ပါတယ်။

ဒီလုပ်ငန်းခွင်ကတော့ Filevskaya လိုင်းလို့ခေါ်တဲ့ မော်စကိုမြို့ အနောက်မြောက်ဘက် ဒေသများနဲ့ မြို့တွင်းကို ဆက်သွယ်ပေးထားတဲ့ လိုင်းကို တိုးချဲ့ဖောက်လုပ်နေတဲ့ မြေအောက်ရထားလမ်း ဥမင်တူးဖော်ရေး လုပ်ငန်းခွင် ဖြစ်ပါတယ်။ Krylatskoe ဘူတာနဲ့ Myakininskaya ဘူတာနှစ်ခုကြားကို ချိတ်ဆက်ပေးမဲ့ မြေအောက် ရထားလမ်း လိုဏ်ခေါင်း ဖြစ်ပါတယ်။ ဒီဥမင်ကို တာဝန်ယူ ဖောက်လုပ်နေတဲ့ အဖွဲ့အစည်းကတော့ ဥမင်လိုဏ်ခေါင်း အထူးအဖွဲ့လို့ ခေါ်တဲ့ TO-6 အဖွဲ့ဖြစ်ပါတယ်။ ယခုအချိန်မှာ ဖောက်လုပ်ပြီး ဥမင်လိုဏ်ခေါင်း အရှည် ၁ ကီလိုမီတာခွဲ ကျော်ကျော် ရောက်ရှိနေပြီ ဖြစ်ပါတယ်။ ဥမင်ကို Krylatskoe ဘူတာအနီးရှိ Starting shaft မှ LOVAT ကုမ္မဏီထုတ် Earth pressure balance shield နဲ့ တူးဖော်နေတာ ဖြစ်ပါတယ်။ တူးဖော်ပြီး မြေစာများကိုတော့ Herrenknecht ကုမ္မဏီထုတ် conveyor နဲ့ သယ်ယူတာ ဖြစ်ပြီး Starting shaft မှတဆင့် မြေသယ်ကားများနဲ့ သယ်ထုတ်တာကို တွေ့ရပါတယ်။ လက်ဝဲဘက် ဥမင်ကိုကတော့ ဖောက်လုပ်ရေး လုပ်ငန်းများ အားလုံးပြီးစီးနေပြီး ဖြစ်ပြီး လက်ယာဘက်ဥမင်ကတော့ ဖောက်လုပ်ဆဲ ဖြစ်ပါတယ်။ ရေလုံ သံကူကွန်ကရစ် ဘလောက်တုံး lining ကို အသုံးပြုတပ်ဆင်ထား အသုံးပြုထားပါတယ်။ စက်စွမ်းအားပြည့် လည်ပတ်နိုင်ပေမဲ့ လုံလောက်တဲ့ ကွန်ကရစ် ဘလောက်တုံးများကို စက်ရုံမှ အသင့် မထုတ်ပေးနိုင်တာကြောင့် တစ်လလျှင် ဥမင်တူးဖော်ပြီးစီးမှု ၂၉၀ မီတာကျော်ပဲ ရောက်ရှိတယ်လို့ ဆိုပါတယ်။

ကျွန်တော်တို့ အဖွဲ့ ဥမင်လုပ်ငန်း စတင်ရာ Starting shaft ကိုရောက်ရှိတဲ့ အခါမှာ အဆိုပါ လုပ်ငန်းခွင်မှာ တာဝန်ရှိသူများက ကြိုဆိုပြီး ဥမင် ဖောက်လုပ်ရေး မြေပေါ်လုပ်ငန်းခွင်၊ ကွန်ကရစ် ဘလောက်တုံး ထုတ်လုပ်ရေး စက်ရုံနဲ့ အခြား အဆောက်အဦးများကို လိုက်လံရှင်းလင်း ပြသပါတယ်။ ထို့နောက်မှာ ဥမင်တူးဖော်ရေး လုပ်ငန်းများ လုပ်ကိုင်နေတဲ့ Starting shaft ထဲကို ဆင်းပြီး ဖောက်လုပ်ပြီး လက်ဝဲဘက် ဥမင်ကို ဦးစွာ လေ့လာကြည့်ရှု ကြပါတယ်။ ဥမင်အတွင်းပိုင်း လုပ်ငန်းများ ရာနှုန်းပြည့်နီးပါပြီးစီးနေပြီး ရထားပြေးဆွဲရန် အတွက် လိုအပ်သော လျှပ်စစ်လွှတ်ထားမည့် လိုင်း (Third rail) နှင့် အခြား cable pipe များသာ တပ်ဆင်ရန် ကျန်ရှိပါတော့တယ်။ ဥမင်အတွင်း တပ်ဆင်ထားသော ကွန်ကရစ် ဘလောက်တုံးများကို အဓိက လေ့လာကြည့်ရှုခွင့် ရရှိပြီး လုပ်ငန်းခွင် တာဝန်ရှိသူများမှ ပြည့်စုံစွာ ရှင်းလင်း ပြောကြားပေးပါတယ်။

ထို့နောက် ကျွန်တော်တို့ အဖွဲ့ဟာ လက်ယာဘက် တူးဖော်နေသော ဥမင် လိုဏ်ခေါင်းထဲကို ၀င်ရောက် ခဲ့ပါတယ်။ ဥမင်အလျား ၁.၅ ကီလိုမီတာကျော် တူးဖော်ပြီးစီးနေပြီ ဖြစ်လို့ ဥမင်တူးဖော်ရာ မျက်နှာပြင် (လုပ်ငန်းခွင်) အထိရောက်အောင် တော်တော်လေး လမ်းလျှောက် ကြရပါတယ်။ ဥမင်အတွင်း လေ၀င်လေထွက် ကောင်းအောင် ပြုလုပ်ထားသော်လည်း ကွန်ကရစ် ဥမင်ဖြစ်သည့်အတွက် အသက်ရှုရတာ မကောင်းလှပါ။ ဥမင်တလျှောက် ရေစိမ့်ဝင်မှုမှ ကာကွယ်ရန်အတွက် နောက်ဆုံးအဆင့် ဘိလပ်မြေ မှုတ်သွင်းခြင်းလုပ်ငန်း (injection) လုပ်ကိုင်နေတာကို တွေ့ရပါတယ်။ နာရီဝက်ခန့် လှမ်းလျှောက်ပြီးတဲ့ နောက်မှာ ဥမင်တူးဖော်နေတဲ့ လုပ်ငန်းခွင် မျက်နှာပြင်ကို ရောက်ရှိပါတယ်။ Mechanized complex တစ်ခုလုံးကတော့ LOVAT ကုမ္မဏီထုတ် complex ဖြစ်ပြီး Shield နဲ့ တဆက်တည်း ပါရှိပါတယ်။ ကွန်ကရစ် lining ဘလောက်တုံးများကို စက်ဝိုင်းပုံ ဘလောက် erector နဲ့ တပ်ဆင်ပါတယ်။ ကျွန်တော်တို့ ရောက်သွားတဲ့ အချိန်မှာတော့ ကွန်ကရစ်ဘလောက်တုံးများ တပ်ဆင်ပြီးစီးလို့ complex နဲ့ shield ကို ရှေ့ကိုတိုးဖို့ ဆောင်ရွက်နေချိန်ဖြစ်ပါတယ်။ အဆိုပါ တူးဖော်ရေးနဲ့ တပ်ဆင်ရေး လုပ်ငန်းခွင်မှာ လုပ်ကိုင်နေတဲ့ အလုပ်သမား ၅/၆ ယောက်ခန့်ကို တွေ့ရပါတယ်။ EPB shield ရှေ့ကို ရောက်တဲ့ အချိန်မှာတော့ လုပ်ငန်းခွင်တာဝန်ရှိသူများက Shield နဲ့ပတ်သက်ပြီး ရှင်းလင်းပြောကြား ပေးပါတယ်။

ဒီနေ့ ခရီးစဉ်မှာတော့ ကျွန်တော်တို့ အဖွဲ့ဟာ မြေအောက် ရထားလမ်း ဥမင်လိုဏ်ခေါင်း တူးဖော်ရေးနဲ့ ပတ်သက်လို့ အတွေ့အကြုံများစွာ ရရှိလိုက် ပါတယ်။ ဥမင်လိုဏ်ခေါင်း တူးဖော်ရေး လုပ်ငန်း အဆင့်ဆင့်ကိုလည်း ယခင်ကထက် ပိုမို သဘောက်ပေါက် နားလည်ခဲ့ကြပါတယ်။ အပြန် ခရီးမှာတော့ ကျွန်တော်တို့ အဖွဲ့ဟာ စုပေါင်းဓာတ်ပုံတွေ ရိုက်ခဲ့ကြပြီး မီနီဘတ်စ်ကားနဲ့ပဲ အဆောင်ကို ပြန်ခဲ့ပါတယ်။ လိုက်ပါ ပို့ဆောင်ပေးတဲ့ ဆရာ၊ ဆရာမများနဲ့ လုပ်ငန်းခွင် အတွင်း စေတနာပါပါနဲ့ လိုက်လံ ရှင်းလင်း ပြသပေးတဲ့ တာဝန်ရှိသူများကို အထူးပဲ ကျေးဇူးတင်ရှိပါကြောင်း ဒီပို့စ်နဲ့ ရေးသား ဖော်ပြလိုက်ရပါတယ်။

ဗီဒီယိုဖိုင်

Related Posts
လုပ်ငန်းခွင် လေ့လာရေး(၁)

ပရင့်ထုတ်ရန်